كل عقلك تجي وتسال عالاحوال

كل عقلك تجي وتسال عالاحوال
يعني شلونه المفارك حبيبه
لاتسال تعال بعينك او اشوف
تصد لوجهنه وتقره المصيبه
رسايلكم كبل شو تفرق هواي
ورق ذيج الرسايل والهه هيبه
ترسلي كلبك او اني ادري مرسوم
واحطة بكلبي ويطفي لهيبه
كلب مرسوم اني بكلبي اخلي
وهسة الماخذك حطك بجيبه
كبل زائد تخلي بين قلبين
ونتيجة حبنه شوطلعت غريبة
جنت ادري تريد البينه ايموت
وجن الزائد تحول صليبه
او مو ابيض قلب لتكلي غلطان
القلب ابيض حقه من كثر شيبه
على حبنه جنت امنول الشوك
بعتني وعله المثلك مو عجيبه
عن الماخذك اني افترق اهواي
اني عمري كضيته وياك طيبه
تعال وارد اصفي وياك الاحساب
اطيتك عُمر لازم تجيبه
حال الدنيه هذا وعشره متدوم
والي ايحب صدك هذا نصيبه
وخاف تشوفني او تذكر الفات
وابشرك موتي صارت قريبه