قلبك سفينة نوح
قلبك سفينة نوح يا خامس اهل النَوْح
ببحر المصايب شفت العجايب يا خامس اهل النوح
...................................................................................
أساطيل الحزن خمسة بدايتهم نبي آدم
خرج من جنة الباري بنحيب وحسرة و اتندم
يعيش بلهفة كل عمره و بقى يعاني الحزن والهم
لجن ما شاف أهل بيته ضحايا مخضبين بدم
وانته بقلب مجمور عالغبرة شفت بدور
بقاع النوايب شفت العجايب يا خامس اهل النوح
...................................................................................
اذا عددنا هالخمسة الاول ادم بعصره
وثانيهم نبي الله نوح الوالف الحسرة
ينوح وينحب لقومة و يلوج ويسفح العبرة
نوح اسمة على اسم النَوْح يحن ينوح كل عمره
مهما يقاسي اهموم ما لاقى يمه جسوم
فوق الترايب شفت العجايب يا خامس اهل النوح
........................................................................
الرواية اتقول هالخمسة ثالثهم نبي يعقوب
يوسف غاب عن عينه وعلى فراقه يحن و يلوب
حتى بيضت اعيونه وبقلبه الجمر منشوب
وبتالي المطاف وياه تلاقى و حقَّق المطلوب
و أنته فقدت أحباب ما عوَّد اللي غاب
جم والي غايب شفت العجايب يا خامس أهل النوح
........................................................................
غِدت رابع البكّاءِ أمك فاطمة البضعة
لمن سمعت الناعي بمصاب المصطفى ينعى
على فقده انهضمت الزهرة و غِدَت لفراقه منفجعة
بنوا بيت الحزن الها و أبد ما بطلت الدمعة
و انت بدمع مسفوح مثل الوديعة تنوح
يبن الاطايب شفت العجايب يا خامس أهل النوح
آدم ما بجى مثلك و لا نوح بدمع هامر
و لا يعقوب مثلك ناح على مفقوده بقلب شاجر
أظن بس امك الزهرة بجت مثلك يبو الباقر
حفر دمعك اخاديده على خدك من جفن ساهر
وشتنسى يالسجاد من طاحت الأجساد
بفقد الغوالب شفت العجايب يا خامس اهل النوح
............................................................
مصابك يا علي السجاد مثيله على البشر ما مر
على يمينك تصد عينك جثث و توزعت بالبر
على يسارك تصد شتشوف خيم بيها اللهب يسعر
و جدامك تصد تلقى يتاما مذعِّرة و خدَّر
خوف و عطش و أخطار خيل و لهيب النار
بحرق المضارب شفت العجايب يا خامس أهل النوح